Twitter

Sa e gjate më duket kjo natë

E gjatë është kjo natë për mua, shumë e gjatë

Nuk di mëngjesi si do të më qelë

I pashpresë qëndroj, i vetëm dhe i ngratë

Me gjynahe i ngarkuar dhe i mjerë.

Pse kjo natë më duket kaq e gjatë

Përse heshtja zemrën ma trazon

Pse nuk gjej dot prehje në këtë shtrëngatë

Përse dëshpërimi shpirtin ma kaplon.

Si hije e venitur endem në errësirë

Në shpirt e në mendje i trazuar

Kërkoj diçka të humbur në këtë mugëtirë

E lus Zotin të mos më ketë harruar.

Mos më harro o Zot, në dritë më udhëzo

Më fal, më ndje e mos më le në errësirë

I lënduar në shpirt jam, o Zot më shpëto

Ndaj meje të ngratit, kij pakëz mëshirë.

Vetëm nga Ti vjen shpresa e mëshira

Vetëm Nuri Yt , zemrën ma ndriçon

Vetëm nga Ti çdoherë vjen e mira

Vetëm Ti o Zot, çdo brengë e largon.

Sabri Bajgora

Mars 2008